كلام عن نفسي
للشاعرة: مريم نبيل
هتكلم عن نفسي شوية.
وهفكر في أيامي الجاية.
هحكي ازاي نسيت الماضي.
وازاي عن نفسي بقيت راضي.
وبقيت أضحك وأنا ماشي على الشط وأشوف وشي في وش الماية.
هحكي ازاي عديت أحزاني.
وازاي مبقتش على روحي جاني.
هضحك عليكوا بكلمتين حلوين.
وأداري جوايا أحزان وأنين ملهاش لزوم تخرج دلوقت.
هيبقى كلامى في يوم حقيقي أكيد بس مع الوقت.
افتحوا أول صفحتين في دفتر حياتي.
هتلاقوهم حلوين وتستغربوا غموضي بس كملوا.
كملوا باقي صفحاتي.
هتشوفوا دموعي وآهاتي، هتحسوا بقلبي المسكور، وتسألوني عايش ازاي لغاية دلوقت.
ومتستغربوش من ضحكي في أخر صفحتين.
ما خلاص أنا مت من جوه، قلبي مش هو ولا هو اللى كان زمان بقا حجارة خلاص اتجمد بقا حزين.
مبقاش ينفع غير انه ينبض دم تك، دم تك.
هتشوفوا واحد خلاص اتغير.
قلبه مبقاش قادر على حياة.
هخرجكوا من حياتي وأودعكم بكل هداوة من بعيد.
هبقى شخص عنيد.
هبيع دفتري القديم بالمجان.
وأجيب واحد بداله جديد.
ومن الغالي.
وأكتب في أول سطرين أحزانى.
وباقي صفحاتي هتبقى عيد في عيد.
أصل أنا أمي دعيالي.
أنا، أمي دعيالي.
كاتبة الأشعار
مريم نبيل
"جريدة حياة"
تعليقات
إرسال تعليق