الأستاذ وفاء عزيز مُعلمة كيمياء للمرحلة الثانوية.
السيرة :
في البداية و أنا في الثانوية العامة لما جبت 93% حسيت إن الموضوع بالنسبالي الحياة وقفت و مكنتش عاوزة غير كلية صيدلة وخلاص ضاعت مني و كنت فاكرة ان الحياة هنا وقفت ، لكن بعدها ربنا ألهمني ادخل حاجه فيها كيمياء لاني بحبها ، كلية صيدلة كنت عاوزها عشان فيها كيمياء و قولت خلاص هدخل كلية تربية قسم كيمياء و زي ما أنا بحب الكيمياء هحبب الطلاب بتوعي فيها و دا كان العامل الأساسي اللي خلاني أدخل كلية التربية و أحب التدريس و بدأت وأنا في الكلية اني ملجأش أبداً لأي كورس و بالفعل الحمد لله طول ال 4 سنين ملجأتش لأي كورس عشان الحاجه الصعبة أقدر اشرحها لنفسي عشان بعد كدا أقدر اشرح للطلاب وأوصلهم المعلومة و عشان أقدر احببهم في الكيمياء زي منا بحبها بالظبط ، وبعد ما اتخرجت بدأت دروس برايفت مع الطلاب عشان أقدر أذاكر المنهج كذا مرة وأكون متمكنة منه وأحل أسئلة في كذا كتاب عشان أكون ملمة بالأفكار والتريكات و بدأت 3 ثانوي من تاني سنة اشتغلت فيها وحالياً داخلة على 5 سنين في المجال و الدروس ، و بالنسبة لمادة الكيمياء فكتير بيقولوا انها صعبة ، وكان طالع ميمز كدة لما يكون فيه حاجة صعبة فيقولك يا عم عادي هي كيمياء !
الكيمياء بالنسبة لناس كتير مادة صعبة بس لو فهمتها هتكون أسهل مادة بالنسبالك ، فأنت عشان تفهم الكيمياء و تحبها لازم يكون عندك أساسيات ، فبركز على الأساسيات دي بالنسبة لأي طالب سواء في أولى أو تانية أو تالتة فبيكون المادة بالنسباله سهلة ، فأنا عشان بحب الكيمياء بحاول أوصلهم حب الكيمياء دا
و الحمد لله بشهادة أي طالب عندي بيقولي أنا بقيت حابب الكيمياء أوي ، يعني مثلاً آخر باب في منهج تالتة ثانوي اللي هو العضوية بيكون أتقل باب و بيكون أكبر باب ف عشان خاطر انا بحببهم فيه و بفهمهم من أول و جديد فبيقولوا عليه ان أسهل باب في الكيمياء هي الكيمياء العضوية و بيستغربوا أوي لو أي حد من صحابهم قالهم انه باب صعب أو انهم مش فاهمينه بس هما عشان فهموا و عرفوا ازاي يحلوا معادلات و يرسموا المركبات و يحلوا على التفاعلات فالنسبة لهم الكيمياء سهلة أوي ، فأنا بكون فرحانة جداً لما الطلابب يقولوا أنا بحب الكيمياء أو أنا بقيت بحل كتير في الكيمياء .. التدريس شغلانه كويسة جداً بس عايزة صبر ، أنا كنت انسانة صبري قليل بس التدريس علمني ابقى صبورة و كنت في البداية مفكرة ان الطالب لو سالني كتير هتعصب بس دا محصلش ، الطالب لو مسألش كتير هعرف انه مش فاهم ، لما انت تسألني مرة واتنين و تلاته هجاوبك مرة و اتنين و اربعة كمان لكن لما تفضل ساكت يبقى لا انت و كدا مش كويس خالص ومش هنكون متفقين ، وعشان تبقي متمكن من الكيمياء أو من أي مادة لازم تسأل في أي معلومة شاغلة بالك عشان تلاقي ليها إجابة والدنيا تكون واضحة قدامك.
المحررة:
شروق حمام
حرفيا انتي قدوه الانسان يتشرف بيها وبانه عرفها في يوم وحرفيا انا فرحانه جداا ان انا عرفتك وجزاكي الله كل خير علي كل حاجه علمتيها ليا ❤❤
ردحذف