قصيدة خلفة البنات
للشاعر: أمير محفوظ
سرحان في المواصلات حزين
بفكر في احوالي
بقى عندي من البنات اتنين
طاب من غير واد مين يرعاني
...
مالت العجوز وقالت
بصوت خافت بسيط
مالك ياوليدي ساكت
لتكون يا واد عبيط
...
رايح فين دأنا شيفاك
من أول الطريق
باصص على الشباك
دمعك في عنيك غريق
...
لا قادر تبكي وتنوح
ولا عارف تصلب ضهرك
احكي يا ولدي وبوح
ايه اللي تاعبك وقاهرك
لتكون عاشق مجروح
حبيبك هجرك وفارقك
...
لا شكلك عيل تقيل
مش بتاع حب وهيام
كنك كنت شهم واصيل
مع صاحب ولد حرام
وكان رد الجميل
منه فجر وخصام
...
مترد يا واد وافضفض واحكي
دأنا زي ستك هفيدك
ومهما كان اللي قاهرك يا ولدي
ما هتاخد غير نصيبك
...
قولتلها يا حجه مفيش
بس شوية صداع
ومحدش في الدنيا بعيش
خالي من الأوجاع
...
قالتلي صداع ايه !! يا حزين
دأنا عمري ضاع في المر
وليا باع في الحزن سنين
عشته ودقت طعمه المر
واعرف شكله من نظرت عين
فقول ليه باين فـ عنيك قهر
...
أقول ايه بس يا خاله
في طريق مفهش رجوع
وتفيد بإيه القواله
في نسل صبح مقطوع
...
محروم يامه من العطايا
مفيش اللي يكونلي جدع ورفيق
وبإيه هتفيد خلفة الصبايا
لو يوم زارني وجع أو ضيق
...
الخلفه طلعت سكه
ومعدتش فارقه عـ العموم
وفي العمر فاضل تكه
مكتوبلي اعيشها مهموم
...
قالت :
معدتش فارقة كيف يا غشيم
لا دي تفرق كتير
وافهم يا ابو مخ بهيم
إن البنت كل الخير
...
عمر البنت ما كانت خلف سكه
ده البنت في عز الوجع ضحكه
بتنورلك في عتمتك سكه
في حضنك متبّته وماسكه
تطمنك وتحسسك إنك سيد الرجال
ده اللي مخلفش بنات
يبقى مخلفش عيال
...
البنت لما تربيها صح بتبقى فرح
البنت رحمه ومنّه من الوهاب
البنت فرحه ولو صالحه
هتكون سبب لدخولك الجنه من غير حساب
...
وافتكر إن لولا البنت
كيف كنت انت اتخلقت واتكونت
مش امك برضه كانت بنت
وبقت امك.. أمانك.. مأمنك.. أمنك
وأقرب حد ليك على مر الزمان
طيب وزوجتك اللي انت أمانها وهي سكنك
مش قبل ما تكون شركتك وعزوتك وسندك
كانت بنت هى كمان
ولا أختك اللي تحبك حب كبير
وعمرك عليها ماتهون
ولا تقبل إنك تتهان
ياولدي ده أخوات يوسف لما رموه في البيـر
كان كلهم صبيان
...
بناتك دول الحلو اللي بيحلي وبيجلي الوجع
فخليك جدع
وافهم انهم الضي اللي بينور حياتك
دول الشهد المسكر فياريت تتغير وتفكر
وتعيد من الاول وجديد حساباتك
...
وتعرف إن بنانك جنتك عـ الأرض
ومهما الدنيا بالصعب تشتدّ
هما اللين ... هما الدلال
فاسمع مني ياولدي وافهم
إن خلفت البنت دى منهي الجمال
ده كتير من الولاد لما بيكبروا.. بيهجروا
لكن البنات بناتك طول حياتك
هتفضل دايمًا في نظرهم
فخر وقدوة ومثال
فمحدش يقولي البنت زي الولد ده محال
ده اللي مخلفش بنات
يبقى مخلفش عيال
أمير محفوظ
"جريدة حياة"
تعليقات
إرسال تعليق