لسه بحلم
للشاعر: فارس علي حزين
لسه بحلم
مش هقول إني أحسن واحد
ولا هقول إني صاحب السعادة
مش هكون بوجهين ملونين
وش خاص ووش صالح قدام الناس
يشوفوه في المساجد للعبادة
مش هكون نقش عملة يشكلوها الناس
ويضاربوا بيها في البنوك
ويشتروا بيها لنفسهم السعادة
مش هكون طيب يا سادة
طيبتي دي يستحقها الطيبين
الناس اللي مش منافقين
الناس اللي قربهم يشفي جرح القلب الحزين
مش هقول إني صالح ،
في زمن المادة والمصالح
ولا أقول إني طالح ،
أتاجر بقلوب الناس ، أشتري وأرابح
وأرسم البسمة الصفرا في التجمعات والمسارح
والقلب كله مليان سواد يا ساتر
مش هكون زي الكدابين وبمبادئي
أبيعها وبأمانتي أخاطر
قلب طفل جوا إنسان مليان حنان
قلب طفل قام مالقاش في يوم أمان
طفل شاف وشوش ملونه
ماعرفش يميز اللون الأساسي فيهم
رسم في ورقة وردة بيضا مالها لون
وتفاصيلها كلها مغتمه تعمي العيون
مش هقول إني عالم
عارف بأمور الناس والعالم
ولا هقول إني فيلسوف حكيم
وأكتب مبادئ ونظريات للواقع الأليم
وأفترض مناهج يعيشها الناس الطيبين
في ظل اللون الشفاف العتيم
أنا مش كده خالص يا سادة
أنا مش نبي أوجه العباد للعبادة
يعبدوا رب العباد ويبعدوا عن
عبادة المصالح ويبيعوا نفسهم
لأجل مادة
أنا إنسان زيي زيهم
يمكن أكتر حتى منهم
بس بحلم إني أفتح الجفون
ألقى ماعدش كره في العيون
ولا أشوف المصالح والنفاق ممارسة
ويمكن صبحت موضة وعبادة اليوم
ألقى طفل يرسم ورده حلوة كل يوم
ألقى ناس فيها طيبه
ناس قلوبها بريئة
ناس بمخي بحلم يكونوا زي ما بحلم
ولسه فاضل برضو بحلم
إني أشوفهم ولو مرة في يوم
ولسه بحلم إني أشوفهم كل يوم
تمت يوم 18/9/2022
بقلم فارس على حزين
طهطا ــ سوهاج ــ مصر
"جريدة حياة"
تعليقات
إرسال تعليق